سمسميّه سمسميّه .. أحلي حاجه في الدُنيا ديّه
صاحبنا لسه صُغَيَر بيتمشي علي الشط ساعة صُبحيّه
صاحبنا ساعة عصاري يحب يعزف علي السمسميّه
صاحبنا شاب بيلعب كوره علي الرمله النديّه
صاحبنا لعبوله في دماغه بمبادئهم الدُنيويّه
صاحبنا إتقلب حاله و طلعله أنياب و راحت عن وشه الدمويّه
صاحبنا خلاص راح عن باله و نسي البحر و الكوره و السمسميّه
سمسميّه سمسميّه .. مهلبيّه علي شويّة ملوخيّه
صاحبنا بقي يصحي يصرخ في الشوارع : حُمصيّه كُسكُسيّه
صاحبنا بقي يرجع بيته ما يشغل باله إلا الحِلوه الطَريّه
سمسميّه سمسميّه .. طبق كشري و عليه شويّة تئليّه
صاحبنا يقوم من فرشته يغطس و يعوم في الرز أبو ليّه
صاحبنا يملا بطنه و يطبطب علي كرشه و يفقع تقريعته الفنيّه
سمسميّه سمسميّه .. رغفين عيش و أنجر كمونيّه
صاحبنا يأنتخ علي الكنبه و يلعب في صوابع رجليه المهريّه
صاحبنا محدش فينا عارفله نيّه
صاحبنا يفكر يخطط إزاي ينشر سمه بين الغلابه في المدينه القاهريّه
صاحبنا يدبر يرتب إزاي يشفي غِله من اللي بيفهموا في إسكندريّه
سمسميّه سمسميّه .. حبة مكرونه و الحلو عسليّه
صاحبنا ما يعرف إن بلده أصلها إيچبتيّه
صاحبنا ينزل يعلّق يرّبط يشّبط يخّبط في حق اللي منه .. و اللي مستحيّه
سمسميّه سمسميّه .. لهطة قشطه و ألماظيّه
صاحبنا بطل من أبطال الغزوه الصندوقيّه
صاحبنا لسه عايش في عهود الجاهليّه
صاحبنا يشوّح يشلّت يموّت كل اللي يقول : كلمتك ديّة مش اللي هيّ
سمسميّه سمسميّه .. شوية دم و نزلوا علي الأرض الرمليّه
صاحبنا يفرح يهلل يكّبَر .. و مستني المسدس عيديّه
صاحبنا يتمني يجيلوا اليوم إللي يملك فيه الذَريّه
صاحبنا يرفع إيديه بالدم يرد التحيّه
سمسميّه سمسميّه .. سيمون فيميه و بتنجانه مقليّه
صاحبنا بسرعه يرجع بيته علشان يخلص وجباته الزوجيّه
صاحبنا من جواه راضي فاضي و ضميره بيصقفله علي نجاح العمليّه
سمسميّه سمسميّه .. بصله و زتونه و خياره مندّيه
صاحبنا ينام و يحلم بالجنه .. و نهرها و شارعها اللي هيجري فيه ورا الحوريّه
صاحبنا يعرق ينهنه يمسك في صدره .. تطلع من مناخيره الزَفره النهائيّه
سمسميّه سمسميّه .. مولد وعاركه و خلصت القضيّه
صاحبنا مرفرف فرحان كإنه لسه واخد الإعداديّه
صاحبنا ميعرفش اللي مستنيه .. من يومه و هو إبن غبيّه
سمسميّه سمسميّه .. طبق المَزه و مشروبات كحوليّه
صاحبنا راح عن باله فجوره مع نعمات و أختها فتحيّه
صاحبنا فاكر إن الدم اللي هدره بيغسل عنه الخطيّه
سمسميّه سمسميّه .. وجبه كومبو جوه العربيّه
صاحبنا لحظة الحساب .. فاتح صدره مستني الهديّه
صاحبنا لسه مش فاهم .. إنه هياخد علي دماغه و يتبلي بأفظع رَظيّه
سمسميّه سمسميّه .. طبله و رِق و حزام في وسط الجلابيّه
صاحبنا سمع حُكم لا فيه إستئناف و لا عُليا دستوريّه
صاحبنا يرقع بالصوت .. ده هيقضي أخرته في عذابات سرمديّه
صاحبنا هيبقي حطب جهنم .. ذي اللحمه علي النار مشويّه
صاحبنا يركع علي رُكَبُه : هُمَ اللي ضحكوا عليا
صاحبنا يُلطم خدوده علي مصيره ذي الوليّه
صاحبنا يندم يبكي يصرخ .. رجعوني تاني للسمسميّه
صاحبنا يسمعنا بنقوله : ده كان زمان يا قائد البلطجيّه
ليست هناك تعليقات:
إرسال تعليق