الكبير أوي

بني أدم منفسن .. فجأه لقي نفسه حاكم علي الأنفاس
 يا خساره .. كان طيب و إبن حلال .. كان ذي ما بيقولوا .. واد إبن ناس
 كان هادي و بشوش .. كان بني أدم عنده شوية إحساس
كانت وقفته تسند و تسد .. و صرخة الحق منه تهد أجدع نسناس
 لكن بعد ما صادفه كرم ربه و لقي نفسه هو الأس
 بقي شايف اللي حواليه خدم ليه و قفل بصيرته عنهم بالترباس
 إبتدا يبقاله ناس و ناس و يبقي في وسطيهم ذي العساس
مبقاش باصص لحقوق حد و لا مهتم .. و سايب اللي يحتاس منهم يحتاس
 إتبدلت أفكاره وعفنت جوه دماغه .. و بقي يدوس عادي عاللي بينداس
 إتغير حاله وإفتكر نفسه إله .. إبن بياعة القلقاس
 ما هو نسي و قفة أبوه في الغيط .. و أفشة إيديه علي الفاس
و نسي لما كان بيتمني حتي ولو في صوره .. يشوف يعني إيه الأناناس
 نسي كتير و راح عن باله اللي راح .. و القلم وقع من إيديه و إتحط بداله الكاس
 لحس مبادئه اللي كان عشانها مستعد يحارب حتي و لو .. بني ياس
 مش عارف احتقره و لا أكرهه و لا أشفق عليه .. في شبه من الفنطاس
 و لما بقت معارفه من قشطة القوم و زبدة المجتمع هي الأساس
 راح رفع مناخيره لفوق و عملي فيها ابن فرناس
 مش عارف ليه دايما حاسس نفسه من هناك .. ذي ما يكون بيعرق نحاس
 معلش .. بكره يبقي ذي اللي سبقه .. و مقامه يبقي أوطي من نعل المداس