عروستي ..
بمزاج مزاجنا نقول و نعيد
مين فيهم القتيل و مين فيهم الشهيد
بمزاج مزاجنا نرخص الدم و نبيع
دا هو دم الغالي .. و ده دم الوضيع
عروستنا ..
بمزاج مزاجنا نتكلم و نكتب
ميهمناش إذا كنا فيها هنبني و لا نخرب
بمزاج مزاجنا نقسم الناس و نصنف
مين اللي هيروح الجنه و مين لحطب جهنم هيصفصف
عروستهم ..
بمزاج مزاجنا نقول الحلول
طالما في اللي هينفذ بعقل العجول
بمزاج مزاجنا نهرتل و نبرطع
طول ما في حمايه .. اللي هيكلمنا يتقطع
عروستها ..
بمزاج مزاجنا هنعلي و هنرفع
و اللي مش هيقول فينا كلمه حلوه علي وشه و هنرقع
بمزاج مزاجنا هَنعُض و ندوس
علي رقاب اللي مش هيكيشنا دهب و فلوس
عروسته ..
بمزاج مزاجنا نُنصب ع البشر و نكدب
لا هُوَ الكلام بفلوس و لا حد ورانا هيحسب
بمزاج مزاجنا نصرخ و نطلع إشعات
ما البلد بلدنا و عايشين عليها في تبات
بمزاج مزاجنا نهس و نبث
اللي يجي علي نفسنا .. و في وشوكوا نفِس
ها .. عرفتونا نبقي مين ؟ .. يا ولاد الناس الــــــــــــــــــــــــــكويسين
عروستك ..
خدها و هج يا بن الناس
قبل ما يخطفوها منك و الفاس تبقي جوا الراس
و ترجع تقول يالهوتي و تقعد إيديك علي خدك محتاس
متقوليش أنا صاحب الأرض و قاعد فيها
متقوليش أنا أصل الأرض و هدبح اللي يلعب بيها
ساعتها هشتمك و من الكلمه الحلوه هاحرمك و بالمداس هاعلمك
ليست هناك تعليقات:
إرسال تعليق